არჩილ გორდულაძე ევროპის საბჭოს საპარლამენტო ასამბლეის მონიტორინგის კომიტეტის თანამომხსენებლებს შეხვდა
იურიდიულ საკითხთა კომიტეტის თავმჯდომარე არჩილ გორდულაძე ევროპის საბჭოს საპარლამენტო ასამბლეის მონიტორინგის კომიტეტის თანამომხსენებლებს შეხვდა.
შეხვედრაზე საქართველოს პარლამენტის მიერ მიღებულ კანონმდებლობაზე ისაუბრეს.
არჩილ გორდულაძის განცხადებით, პარლამენტის მიერ მიღებული კანონმდებლობა სრულ შესაბამისობაშია საქართველოს კონსტიტუციასთან და ადამიანის უფლებების სტანდარტებთან.
მისივე განმარტებით, შეკრებისა და მანიფესტაციებთან დაკავშირებული კანონმდებლობა და ადმინისტრაციულ სამართალდარღვევათა კოდექსში განხორციელებული ცვლილებები გაცილებით მსუბუქია, ვიდრე ევროკავშირის სხვა ქვეყნებში.
„როგორც ევროპული ქვეყნების, ასევე, ჩვენი საკანონმდებლო სივრცე, თანხვედრაშია ადამიანის უფლებების სტანდარტებთან, რასთან დაკავშირებითაც არაერთ შემთხვევაში სტრასბურგის სასამართლოსაც მიღებული აქვს გადაწყვეტილებები“, - აღნიშნა არჩილ გორდულაძემ.
როგორც იურიდიულ საკითხთა კომიტეტის თავმჯდომარემ განაცხადა, ევროპის საბჭოს საპარლამენტო ასამბლეის მონიტორინგის კომიტეტის წევრებს მმართველი გუნდის პოზიციები გააცნო.
„მზად ვართ, რომ ჩვენი პოზიცია და ქართველი ხალხის ხმა გავაგონოთ ყველას, ვისაც შეიძლება, რომ რაიმე კითხვა ჰქონდეს მიღებულ გადაწყვეტილებებსა თუ კანონმდებლობასთან დაკავშირებით. სრულად ვიღებთ პასუხისმგებლობას, რომ ჩვენ მიერ ნაკისრი ვალდებულებები აუცილებლად შესრულდება“, - განაცხადა არჩილ გორდულაძემ.
