დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ და კომიტეტის თავმჯდომარის პირველმა მოადგილემ, გივი ჭიჭინაძემ საგარეო საქმეთა მინისტრის მოადგილესთან, მიხეილ ნინუასთან და დიასპორასთან ურთიერთობის დეპარტამენტის ახლად დანიშულ დირექტორთან, მუხრან გულაღაშვილთან პირველი სამუშაო შეხვედრა გამართეს.

შეხვედრის მონაწილეებმა გააანალიზეს საგარეო საქმეთა სამინისტროს დიასპორასთან ურთიერთობის დეპარტამენტის გაწეული საქმიანობა, ამასთან, განიხილეს მიმდინარე და სამომავლო თანამშრომლობის მიმართულებები და პერსპექტივები.

აღმასრულებელი ხელისუფლების წარმომადგენლებმა ისაუბრეს უკანასკნელ პერიოდში საგარეო საქმეთა სამინისტროს მიერ განხორციელებულ საგარეო და დიასპორულ პოლიტიკაზე. მიხეილ ნინუას თქმით, სამინისტროს ერთ-ერთი პრიორიტეტი ამ ეტაპზე საკონსულო საქმიანობასთან დაკავშირებული სერვისების გაუმჯობესებაა, რაც ახლო და მომავალ პერსპექტივაში პოზიტიურ ასახვას ჰპოვებს უცხოეთში მცხოვრებ თანამემამულეებსა და ქართულ სახელმწიფოს შორის ურთიერთობაში. „ჩვენ აქტიურად ვიმუშავეთ და გამოვცვალეთ საელჩო და საკონსულო შენობები არაერთ ქალაქში: რომში, სადაც ძალიან დიდი დატვირთვაა, შვედეთში, ლონდონში, სტრასბურგში, პარიზში. განსაკუთრებით აღსანიშნავია ავსტრიაში, ვენაში საელჩოსა და საკონსულოს საქმიანობა, სადაც მოხდა არა მარტო საოფისე ფართების კეთილმოწყობა, არამედ, სერვისებისა და მომსახურების მნიშვნელოვნად გაუმჯობესება“, - აღნიშნა მან.

საგარეო საქმეთა მინისტრის მოადგილემ, ასევე ყურადღება გაამახვილა იმ ფაქტზე, რომ მუხრან გულაღაშვილი დიდი ხნის განმავლობაში წარმოადგენდა გენერალურ კონსულს თესალონიკში, არის გამოცდილი დიპლომატი, რაც ნიშანდობლივია, ვინაიდან იგი იცნობს დიასპორის ყველა ფენის საჭიროებებსა და გამოწვევებს.

დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ განაცხადა, რომ საჭიროა ყოველდღიური კონტაქტები და ღია თანამშრომლობა საკანონმდებლო ორგანოსა და სამინისტროს დიასპორასთან ურთიერთობის დეპარტამენტს შორის. „უნდა მოხდეს ადგილსამყოფელი ქვეყნების მიხედვით, ქართულ დიასპორებში არსებულ გამოწვევებზე სწრაფი და ეფექტური რეაგირება, ახალი ტიპის მექანიზმების შემუშავება, რისთვისაც აუცილებელია ორ უწყებას შორის ინფორმაციების დროული გაცვლა და ერთობლივი მჭიდრო მუშაობა“, - აღნიშნა მან.

საკანონმდებლო ორგანოს წარმომადგენლებმა ყურადღება გაამახვილეს, უახლეს პერიოდში, აშშ-ის და დასავლეთ ევროპის ქვეყნების დიასპორულ ორგანიზაციებთან გამართული შეხვედრების შედეგებზე, უცხოეთში მცხოვრები ჩვენი თანამემამულეების მიერ წამოჭრილ საკითხებზე და მიზანშეწონილად მიიჩნიეს აღმასრულებელი ხელისუფლების მხრიდან მათზე რეაგირება.

შეხვედრაში, ასევე მონაწილეობდა დიასპორისა და კავკასიის საკითხთა კომიტეტის ახლად არჩეული თავმჯდომარის მოადგილე თამაზ ნავერიანი.

შეხვედრის დასასრულს, მხარეები შეთანხმდნენ სამომავლოდ ახალი ერთობლივი პროექტების, მოსალოდნელი საკანონმდებლო ცვლილებების შემუშავებასა და მჭიდრო თანამშრომლობაზე.