პარლამენტის აგრარულ საკითხთა კომიტეტის თავმჯდომარე გელა სამხარაული გაეროს სოფლის მეურნეობის განვითარების საერთაშორისო ფონდის (IFAD) დირექტორს ბიდიშა ბაროას შეხვდა.

მხარეებმა შეხვედრაზე ისაუბრეს გაეროს გენერალურ ასამბლეაში სასოფლო-სამეურნეო მონაცემთა სისტემის ხელშეწყობის მიზნით შექმნილ ინიციატივაზე - 50x2030, რომელსაც საქართველო 2022 წლიდან შეუერთდა.

ყურადღება ასევე გამახვილდა მონაცემთა ინტერპრეტაციისა და მათი გამოყენების, ანალიტიკური გადაწყვეტილებების და ძირითად სტატისტიკურ მონაცემებთან მომუშავე კადრის გადამზადების საკითხებზე.

შეხვედრაზე ასევე ისაუბრეს გელა სამხარაულის ინიციატივის შესახებ, რომელიც „სოფლის მეურნეობისა და სოფლის განვითარების შესახებ“ კანონპროექტში იმ დამატების შეტანას ითვალისწინებს, რომლის თანახმადაც, საქართველოს გარემოს დაცვისა და სოფლის მეურნეობის სამინისტრომ უნდა გააკეთოს ფერმერული მეურნეობებისა და სოფლად საწარმოების რეესტრის მონაცემების ანალიზი, საპროგნოზო მონაცემების წარმოების მიზნით.

ასევე, ხაზგასმით აღინიშნა ფერმერთა და ფერმერული მეურნეობების რეგისტრაციის და სასოფლო-სამეურნეო პროდუქციის შესახებ საინფორმაციო დოკუმენტის მომზადების საჭიროება, რომელიც შეიძლება დაინერგოს IFAD-თან და სამინისტროსთან თანამშრომლობით.

​„ჩვენი ფერმერებისთვის მნიშვნელოვანია სასოფლო-სამეურნეო მონაცემთა სისტემის დანერგვა, რაც ხელს შეუწყობს მათ კიდევ უფრო უკეთესად განავითარონ საკუთარი მეურნეობა და დაგეგმონ პროდუქციის რეალიზაციის შესაძლებლობები. იმის გამო, რომ ამ მიმართულებით ფერმერებს არ აქვთ შესაბამისი ცოდნა, ისინი გარკვეული სახის პრობლემების წინაშე დგებიან, მათ შორის, ადგილობრივი თუ საერთაშორისო ბაზრების ათვისების და გარკვეული პროგნოზების გაკეთების კუთხით, რაც ერთმნიშვნელოვნად აფერხებს მათი საქმიანობის განვითარებას. ასეთ შემთხვევაში მნიშვნელოვანია გაეროს სოფლის მეურნეობის განვითარების საერთაშორისო ფონდის მხარდაჭერა, ფონდის დირექტორმა აღგვითქვა, რომ ფონდი ითანამშრომლებს ჩვენთან ანალიტიკური მხარდაჭერისა და გადამზადების მიმართულებით“, - განაცხადა გელა სამხარაულმა შეხვედრის შემდეგ.