განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ, საქართველოს პარლამენტში სტუმრად მყოფ, ბათუმის შოთა რუსთაველის სახელმწიფო უნივერსიტეტის სტუდენტური პროექტის „ვიზიტები სახელმწიფო უწყებებში“ მონაწილეებს პარლამენტისა და განათლების, მეცნიერებისა და ახალგაზრდულ საქმეთა კომიტეტის საქმიანობის ძირითად მიმართულებებზე ინფორმაცია მიაწოდა.

საუბარი შეეხო ზოგადი და უმაღლესი განათლების სისტემაში დაგეგმილ რეფორმებს. სტუდენტებმა, ინტერაქტიულ ფორმატში, რეფორმებთან დაკავშირებით საკუთარი მოსაზრებები დააფიქსირეს.

„სტუდენტებთან განათლების რეფორმებთან დაკავშირებით ვისაუბრეთ. მსგავსი ტიპის კომუნიკაციას სტუდენტებთან და ახალგაზრდებთან მომავალშიც აუცილებლად გავაგრძელებთ, რადგან საინტერესოა მათი ხედვებისა და მოსაზრებების მოსმენა,” - განაცხადა გიორგი ჩაკვეტაძემ.

სტუდენტებმა პარლამენტის შენობა დაათვალიერეს და ექვთიმე თაყაიშვილის სახელობის ქართული პარლამენტარიზმის მუზეუმსაც ეწვივნენ.