საქართველოს პარლამენტის წევრებმა გიორგი ხელაშვილმა, დავით მათიკაშვილმა და ირაკლი ზარქუამ სუამის საპარლამენტო ასამბლეის სესიის მუშაობაში მონაწილეობა ონლაინ ფორმატში მიიღეს.

სესიაზე განიხილეს უკრაინაში რუსული აგრესიის შედეგად შექმნილი მძიმე ვითარება, რომელმაც ენერგომომარაგების მიმართულებით მნიშვნელოვანი პრობლემები შექმნა.

მონაწილეებმა იმსჯელეს უსაფრთხოებისა და ენერგეტიკული კრიზისის პირობებში თანამშრომლობის პერსპექტივებზე და სამომავლო გეგმებზე.

ქართული დელეგაციის ხელმძღვანელმა, გიორგი ხელაშვილმა სიტყვით მიმართა სესიის მონაწილეებს, ხაზი გაუსვა საქართველოს ურყევ მხარდაჭერას უკრაინისა და უკრაინელი ხალხის მიმართ და ისაუბრა უკრაინის და ევროპის ენერგოუსაფრთხოებაში სუამ-ის ქვეყნების თანამშრომლობის მნიშვნელობაზე.

გიორგი ხელაშვილმა დელეგატებს საქართველოს ოკუპირებულ ტერიტორიებზე არსებული ვითარების შესახებ ინფორმაცია მიაწოდა.

ეროვნული საპარლამენტო დელეგაციების გარდა შეხვედრას ბალტიის საპარლამენტო ასამბლეის წარმომადგენლები ესწრებოდნენ.