შავი ზღვის ეკონომიკური თანამშრომლობის საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელმა ირაკლი მეზურნიშვილმა შავი ზღვა-რიზე-აიდერის საერთაშორისო ფორუმში მიიღო მონაწილეობა. ფორუმის განხილვის მთავარ თემას წარმოადგენდა „ტრანსპორტი და ლოგისტიკა შავი ზღვის რეგიონში“.

ფორუმის გახსნით ნაწილში სპეციალური ვიდეო მიმართვით ჩაერთო თურქეთის რესპუბლიკის პრეზიდენტი რეჯეფ თაიფ ერდოღანი.

დელეგატებს სიტყვით მიმართა ირაკლი მეზურნიშვილმა და შავი ზღვის რეგიონის მნიშვნელობაზე ისაუბრა.

„შავი ზღვის რეგიონს აქვს უზარმაზარი პოტენციალი, როგორც გლობალური სატრანსპორტო, ასევე ლოგისტიკური თვალსაზრისით. სწორედ ამ პოტენციალის რეალიზებისთვის მთავრობებმა, კერძო სექტორის წარმომადგენლებმა და საერთაშორისო ინსტიტუტებმა მჭიდროდ უნდა ითანამშრომლონ. ინვესტიციების და ინოვაციების ხელშეწყობით, ჩვენ შეგვიძლია გამოვიყენოთ ამ სტრატეგიულად მნიშვნელოვანი რეგიონის სრული შესაძლებლობა. მინდა იმედი გამოვთქვა, რომ ეს ფორუმი მომავალ წლებშიც გაგრძელდება. მას აქვს პოტენციალი, გახდეს ფასდაუდებელი პლატფორმა თანამშრომლობის, დიალოგისა და იდეების გაცვლისთვის’’, - განაცხადა ირაკლი მეზურნიშვილმა.

ფორუმში მონაწილეობა მიიღეს შავი ზღვის ეკონომიკური თანამშრომლობის საპარლამენტო ასამბლეის წევრი ქვეყნების საპარლამენტო დელეგაციებმა, სხვადასხვა საერთაშორისო და რეგიონული ორგანიზაციების წარმომადგენლებმა.