განათლების, მეცნიერებისა და კულტურის კომიტეტის თავმჯდომარე მარიამ ჯაში და პარლამენტის წევრი ისკო დასენი საქართველოს ქურთ-ეზიდ მხატვართა ნამუშევრების გამოფენის გახსნასა და მათი შემოქმედების ამსახველი კატალოგის პრეზენტაციაში მონაწილეობდნენ. 

ღონისძიების ორგანიზატორმა - „ქალთა უფლებების სათემო ინიციატივის“ თავმჯდომარემ, ლილი საფაროვამ მადლობა გადაუხადა მარიამ ჯაშს და ისკო დასენს გაწეული თანადგომისთვის და მათ საპატიო სიგელები გადასცა საქართველოს ქურთ-ეზიდთა კულტურული მემკვიდრეობის დაცვასა და პოპულარიზებაში გაწეული განსაკუთრებული ღვაწლისთვის. ქურთ-ეზიდთა თემის წარმომადგენლებმა აღნიშნეს, რომ ყოველთვის გრძნობენ მარიამ ჯაშის ყურადღებას და მზრუნველობას: „საქართველოში მცხოვრები ქურთ-ეზიდთა თემის ხელოვანი ადამიანების შემოქმედება ნაკლებადაა ცნობილი არა მხოლოდ ჩვენი ქვეყნის მთელი საზოგადოებისთვის, არამედ თვითონ ქურთ-ეზიდთა თემისთვისაც. არადა, მრავალეროვნული და მრავალკულტურული საქართველოს ხელოვნების საგანძურს უდაოდ ამშვენებს ქურთ-ეზიდთა თემის ხელოვნებაც. სწორედ ამიტომ აქვს განსაკუთრებული მნიშვნელობა ქალბატონი მარიამ ჯაშის დიდ თანადგომას. მან არაერთხელ გაგვაოცა ჩვენი თემის ისტორიის, ტრადიციებისა და კულტურული მემკვიდრეობის ისეთი ცოდნით, რითიც ბევრი ჩვენგანიც კი ვერ მოიწონებს თავს“.

მარიამ ჯაშის განცხადებით, საქართველოში მცხოვრები ქურთ–ეზიდი მხატვრებისა და ტრადიციული ხელოვნების ოსტატთა ნამუშევრების ერთიან სივრცეში ხილვა წარუშლელ შთბეჭდილებას ტოვებს მნახველზე. „განსაკუთრებით საინტერესოა ნორჩი მხატვრების შემოქმედების გაცნობა. დღეს კიდევ ერთხელ წარმოჩნდა საქართველოს კულტურული მრავალფეროვნება და ტოლერანტულობა“. - განაცხადა ქალბატონმა მარიამ ჯაშმა.

გამოფენა საქართველოს კულტურისა და ძეგლთა დაცვის სამინისტროსა და საქართველოს ეზიდთა კულტურულ–საგანმანათლებლო ცენტრსი „მოლო ეზდიას“ დაფინასებითა და ნატოსა და ევროკავშირის შესახებ საინფორმაციო ცენტრის ხელშეწყობით მოეწყო.