პარლამენტის წევრები ლაგოდეხის მუნიციპალიტეტის მერიის ახალგაზრდული საბჭოს წევრებს შეხვდნენ
თელავის, ახმეტის, ყვარლისა და ლაგოდეხის დელეგატი ირაკლი ქადაგიშვილი და საპარლამენტო პოლიტიკური ჯგუფის, „ხალხის ძალის“ თავმჯდომარის მოადგილე გურამ მაჭარაშვილი, პარლამენტში სტუმრად მყოფ ლაგოდეხის მუნიციპალიტეტის მერიის ახალგაზრდული საბჭოს წევრებს შეხვდნენ.
დეპუტატებმა ახალგაზრდებს პარლამენტის საქმიანობის ძირითად მიმართულებებზე ინფორმაცია გააცნეს და კანონშემოქმედებითი პროცესის საკითხებზე ისაუბრეს. სტუმრები იმ პროგრამებისა და პროექტების მიმდინარეობით დაინტერესდნენ, რომლებსაც სახელმწიფო ახალგაზრდობის მხარდასაჭერად ახორციელებს.
„ახალგაზრდული საბჭოს წევრებთან შეხვედრისას პარლამენტის ფუნქციებისა და საქმიანობის შესახებ ვისაუბრეთ. ახალგაზრდები განათლების რეფორმისა და სახელმწიფოს მიერ ახალგაზრდული პოლიტიკის მხარდაჭერის საკითხებით დაინტერესდნენ. საუბარი ასევე შეეხო ადგილობრივი თვითმმართველობის საჭიროებების გადაწყვეტის პროცესში ახალგაზრდების ჩართულობას და მათ მიერ მომზადებული პროექტების განხორციელების მნიშვნელობას“, - განაცხადა ირაკლი ქადაგიშვილმა.
პარლამენტის წევრებისა და ლაგოდეხის მუნიციპალიტეტის მერიის ახალგაზრდული საბჭოს წევრების შეხვედრას მუნიციპალიტეტის მერი ჯონდო მდივნიშვილი დაესწრო.
