შოთა ხაბარელი კორეის რესპუბლიკის საქმეთა დროებით რწმუნებულს შეხვდა
კორეის რესპუბლიკის საპარლამენტო დელეგაციების ორი ვიზიტი შეაჯამეს დღეს კორეის რესპუბლიკის პარლამენტთან მეგობრობის ჯგუფის ხელმძღვანელმა, შოთა ხაბარელმა და კორეის საქმეთა დროებითმა რწმუნებულმა, ტონგ ოპმა.
სამუშაო შეხვედრაზე მხარეებმა აღნიშნეს, რომ საპარლამენტო დონეზე ორი ქვეყნის ურთიერთთანამშრომლობა დინამიკურად ვითარდება, რასაც მოწმობს ორმხრივი სამუშაო ვიზიტები და მეგობრობის ჯგუფების აქტიური ურთიერთობა.
შეხვედრის ერთ-ერთ მთავარ საკითხს ნენსკრას ჰესის მშენებლობის საკითხი წარმოადგენდა.
როგორც შოთა ხაბარელმა აღნიშნა, ნენსკრას ჰესის მშენებლობა მნიშვნელოვან სტრატეგიულ პროექტს წარმოადგენს და მისი მშენებლობის გაგრძელებისთვის შესაბამისი დოკუმენტაცია და შეთანხმებები მომზადების პროცესშია.
კორეის საქმეთა დროებითმა რწმუნებულმა აღნიშნული პროექტის გაგრძელების და მისი დასრულების მიმართ დიდი ინტერესი გამოთქვა და აღნიშნა, რომ პროექტის წარმატებით განხორციელების შემდეგ კორეა მზადაა სხვადასხვა საინვესტიციო პროექტი შესთავაზოს საქართველოს.
შეხვედრის დასასრულს მხარეებმა საქართველოში კორეის რესპუბლიკის საელჩოს გახსნის, პირდაპირი ავია მიმოსვლის დაწყების და ტურიზმის ხელშეწყობის საკითხებზე იმსჯელეს.
