ევროკავშირისკენ მიმავალ გზაზე მხარდაჭერა, განსაკუთრებით, ევროკავშირის დამფუძნებელი ქვეყნების მხრიდან, უკიდურესად მნიშვნელოვანია, - ამის შესახებ თინათინ ხიდაშელმა ჟურნალისტებთან საუბრისას განაცხადა. საქართველოს პარლამენტის წევრის განცხადებით, ქართულმა საზოგადოებამ კარგად იცის, რომ საქართველოს ევროატლანტიკური ინტეგრაციის გზაზე გერმანიასა და საფრანგეთს წლების განმავლობაში ჰქონდათ შეკითხვები. „ ამ ქვეყნებს ჰქონდათ გარკვეული კითხვები წლების განმავლობაში და ამიტომ, მნიშვნელოვანია, რომ მათ ადგილზე ნახონ, გაეცნონ ვითარებას, აქ ესაუბრონ პარტნიორებს და იმ შთაბეჭდილებებით დაბრუნდნენ უკან, რაც საქართველოდან აუცილებლად დადებითი და წარმატების მომტანი იქნება“, - განაცხადა თინათინ ხიდაშელმა. გიორგი ვოლსკის განცხადებით, საფრანგეთის საგარეო საქმეთა მინისტრ ლორან ფაბიუსთან და გერმანიის საგარეო საქმეთა მინისტრ ფრანკ-ვალტერ შტაინმაერთან შეხვედრაზე უსაფრთხოების, საგარეო ურთიერთობებისა და ევროპული ინტეგრაციის საკითხები იქნება განხილული. „კიდევ იქნება ვიზიტები, ძალიან ბევრი დელეგაცია ჩამოდის საქართველოში. რასაკვირველია, ორი წამყვანი ევროპული ქვეყნის საგარეო საქმეთა მინისტრის ვიზიტი, აზრთა გაცვლა-გამოცვლა, პოზიციების შეჯერება ძალიან მნიშვნელოვანია“, - განაცხადა გიორგი ვოლსკიმ. საქართველოს პარლამენტის თავმჯდომარის და საფრანგეთისა და გერმანიის საგარეო საქმეთა მინისტრების შეხვედრა, ხვალ, 24 აპრილს გაიმართება.