საგარეო ურთიერთობათა, დიასპორისა და კავკასიის საკითხთა და ევროპასთან ინტეგრაციის კომიტეტების ერთობლივ სხდომაზე 2024 წლის სახელმწიფო ბიუჯეტის შესრულების წლიური ანგარიში მოისმინეს, რომელიც ფინანსთა მინისტრის პირველმა მოადგილემ გიორგი კაკაურიძემ წარადგინა.

მომხსენებელმა გასული წლის მაკროეკონომიკურ მაჩვენებლებსა და ბიუჯეტის შესრულების ძირითად პარამეტრებზე ისაუბრა.

„2024 წლის ბიუჯეტი დავგეგმეთ 5,2%-ის ოდენობით ეკონომიკურ ზრდაზე, თუმცა, შემდგომში უკვე მაღალი ეკონომიკური ზრდიდან გამომდინარე შეიცვალა პროგნოზები და ეკონომიკური ზრდის საბოლოო მაჩვენებელი შეადგენდა 9.4% - ს“, - განაცხადა გიორგი კაკაურიძემ.

როგორც მომხსენებელმა აღნიშნა, მაღალი ეკონომიკური ზრდა მნიშვნელოვნად განაპირობა კერძო სექტორმა.

„გასულ წელს საგარეო ვაჭრობა 8,3%-ით გაიზარდა და 23 მილიარდ 484 მილიონი დოლარი შეადგინა. აქედან ექსპორტის მაჩვენებელი 6 მილიარდ 560 მილიონი დოლარი, ხოლო იმპორტის მაჩვენებელი 16 მილიარდ 924 მილიონი დოლარი იყო. 2024 წელს მთლიან საქონელბრუნვაში ევროკავშირის წილი 22.1%-ს შეადგენს“, - აღნიშნა გიორგი კაკაურიძემ.

როგორც მინისტრის პირველმა მოადგილემ აღნიშნა, ასევე გაიზარდა ტურიზმიდან მიღებული შემოსავალი.

გიორგი კაკაურიძემ კომიტეტის წევრებს სხვადასხვა სამინისტროს მიერ ბიუჯეტის ათვისებისა და შესრულების მაჩვენებლებიც გააცნო. მან განსაკუთრებული ყურადღება საგარეო საქმეთა სამინისტროზე გაამახვილა და აღნიშნა, რომ ყველა პროგრამის შესრულების მაჩვენებელი კარგია.

გიორგი კაკაურიძემ 2025 წლის ეკონომიკურ დინამიკაზე და მომდევნო 4 წლის ძირითად მაკროეკონომიკურ პროგნოზებზეც ისაუბრა.

ევროპასთან ინტეგრაციის კომიტეტის თავმჯდომარემ ლევან მახაშვილმა წარმოდგენილი ანგარიში დადებითად შეაფასა და თავის გამოსვლაში რამდენიმე საკითხზე გაამახვილა ყურადღება.

როგორც მან აღნიშნა, ბიუჯეტის მაჩვენებლები სახელმწიფოს მხრიდან სწორი ეკონომიკური და მშვიდობის პოლიტიკის შედეგია, მითუმეტეს, თუ გავითვალისწინებთ იმ რთულ გარემოს, რომელშიც საქართველო იმყოფება.

მისივე თქმით, აღსანიშნავია, რომ მთლიან სავაჭრო ბრუნვაში ევროკავშირის წილი არის 22.1%.

„მნიშვნელოვანია ის გარემოება, რომ ევროკავშირი კვლავ რჩება საქართველოს მთავარ სავაჭრო პარტნიორად. იმისათვის რომ ბიზნესებმა თავიანთი პროდუქტი გაიტანონ, მათ უნდა დანერგონ ევროკავშირისთვის შესაბამისი სტანდარტები. ეს ხელს უწყობს საქართველოში ევროპული სტანდარტების დამკვიდრებას, საქართველოსა და ევროკავშირს შორის სავაჭრო-ეკონომიკური ურთიერთობების გაღრმავებას, ადგილობრივი წარმოებისა და ქვეყნის საინვესტიციო პოტენციალის გაძლიერებას.
საპროგნოზო მაჩვენებლები შეესაბამება ჩვენი ქვეყნის ამბიციებს, ეს არის ფაქტი, მიუხედავად იმისა, რომ ზოგიერთებს ამის აღიარება არ სურს. ჩვენი მიზანია, რომ 2030 წლისთვის ქვეყანა იყოს მზად საქართველოს ევროკავშირში წევრობისთვის და ეს არ არის უბრალოდ ცარიელი სიტყვები, როგორც ზოგიერთს წარმოუდგენია. ევროკავშირში წევრობა ნიშნავს კონკრეტული რეგულაციებისა და რეფორმების გატარებას და უზარმაზარი თანხების ჩადებას ამ პროცესებში. ყველა სამინისტრო მიმართულია იმისთვის, რომ რეფორმების ნაწილში, ქვეყანა იყოს მზად ევროკავშირში წევრობისთვის. ეს სტანდარტები აუმჯობესებს საქართველოში ცხოვრების პირობებს. ფაქტია, რომ საქმით ქვეყანა წინ დგამს ნაბიჯებს განვითარებისთვის და რა თქმა უნდა, ეს ხელს უწყობს ევროკავშირში წევრობასაც“, - განაცხადა ლევან მახაშვილმა.

კომიტეტების გაერთიანებულ სხდომაზე წარმოდგენილ ანგარიშს მხარი დაუჭირეს.