აგრარულ საკითხთა კომიტეტმა, პარლამენტის რეგლამენტის 47-ე მუხლის თანახმად, საკონსულტაციო საბჭოს შექმნის შესახებ გადაწყვეტილება მიიღო.

 

კომიტეტმა ერთხმად დაამტკიცა საბჭოს 10-კაციანი შემადგენლობა, რომელიც დაკომპლექტებულია სამეცნიერო სექტორის წარმომადგენლებითა და დარგის პრაქტიკოსი სპეციალისტებით.

 

როგორც აგრარულ საკითხთა კომიტეტის თავმჯდომარემ გელა სამხარაულმა განაცხადა, საკონსულტაციო საბჭოს საქმიანობის მიზანია საბჭოს წევრების ცოდნის, გამოცდილებისა და ინტელექტუალური პოტენციალის გამოყენებით, კომიტეტს გაუწიოს საკონსულტაციო მომსახურება აგრარულ სექტორში არსებული გამოწვევებისა და გადაჭრის გზების, თანამედროვე ტექნოლოგიების დანერგვის ხელშეწყობის თაობაზე, სასურსათო უსაფრთხოებისა და სურსათის უვნებლობის უზრუნველყოფის შესახებ და ა. შ.

 

„როდესაც კანონპროექტებს, საკითხებს ვიხილავთ, ყოველთვის მნიშვნელოვანია, რომ ჩვენი ქვეყნის გამორჩეული ადამიანები, დარგის სპეციალისტები ჩართული იყვნენ ამ პროცესებში და გაგვიზიარონ რჩევები სოფლის მეურნეობის დარგის ამა თუ იმ საკითხზე. ეს საბოლოო ჯამში, ისეთი გადაწყვეტილებების მიღებაში დაგვეხმარება, რომელიც გამოადგება დარგსაც და ჩვენს მოსახლეობასაც“, - განაცხადა გელა სამხარაულმა.

 

კომიტეტმა ასევე დაამტკიცა საკონსულტაციო საბჭოს დებულება.