ავსტრიის რესპუბლიკის პარლამენტთან მეგობრობის ჯგუფის ხელმძღვანელი აკაკი ალადაშვილი და მეგობრობის ჯგუფის წევრები საქართველოში ვიზიტად მყოფ ავსტრიის სახალხო პარტიის ახალგაზრდული ფრთის წარმომადგენლებს შეხვდნენ.

შეხვედრაზე მხარეებმა საქართველო-ავსტრიას შორის არსებულ ურთიერთობებზე ისაუბრეს და ორმხრივი თანამშრომლობის მნიშვნელობას გაუსვეს ხაზი.

„ავსტრიის სახალხო პარტიის წარმომადგენლებს ქვეყანაში მიმდინარე პროცესებზე ვესაუბრეთ. მსგავსი შეხვედრები ორ ქვეყანას შორის არსებულ ურთიერთობებს მეტად გააძლიერებს“, - განაცხადა მეგობრობის ჯგუფის ხელმძღვანელმა აკაკი ალადაშვილმა.

მისივე თქმით, სამომავლო თანამშრომლობის ფარგლებში, ქართველი კანონმდებლები ავსტრიის დედაქალაქ ვენას საპასუხო ვიზიტით ეწვევიან.

​ავსტრიის სახალხო პარტიის ახალგაზრდული ფრთის წარმომადგენლებთან შეხვედრას მეგობრობის ჯგუფის წევრები - მარიამ ლაშხი, სოზარ სუბარი, დავით მათიკაშვილი და გიორგი გუგუჩია დაესწრნენ.