პარლამენტის თავმჯდომარის პირველი მოადგილე გიორგი ვოლსკი საქართველოში ვიზიტად მყოფ ყირგიზეთის რესპუბლიკის ჯოგორკუ კენეშის (პარლამენტი) ყირგიზეთი-საქართველოს საპარლამენტო მეგობრობის ჯგუფის წევრებს შეხვდა.

შეხვედრაზე მხარეებმა ორ ქვეყანას შორის არსებული თანამშრომლობის მიმართულებები და ისეთი თემები განიხილეს, რომლებიც საქართველოს ტერიტორიული მთლიანობის საკითხებს, ბიზნესის ხელშეწყობას, ტურიზმის განვითარებას და სატრანზიტო ინფრასტრუქტურის მოწყობას შეეხება.


„ყირგიზეთი საინტერესო ქვეყანაა, რომელიც საკმაოდ ინტენსიურად და სწრაფად ვითარდება. ყირგიზეთის საპარლამენტო დელეგაცია დაინტერესებულია გაეცნოს საქართველოს იმ მიღწევებს, რომლებიც ბიზნესის განვითარებას და მის ხელშეწყობას, ასევე სატრანზიტო ინფრასტრუქტურის და მთიანი რეგიონების განვითარებას შეეხება“, - განაცხადა გიორგი ვოლსკიმ.

ყირგიზეთის საპარლამენტო დელეგაცია ასევე შეხვდა ყირგიზეთის პარლამენტთან მეგობრობის ჯგუფის ხელმძღვანელს დავით მათიკაშვილს. შეხვედრაზე ორი ქვეყნის საკანონმდებლო ორგანოს შორის თანამშრომლობის საკითხები განიხილეს.

შეხვედრას ასევე ესწრებოდნენ ყირგიზეთის პარლამენტთან მეგობრობის ჯგუფის წევრები თენგიზ შარმანაშვილი და ლევან მგალობლიშვილი.