სპორტის, კულტურის და ჯანმრთელობის დაცვისა და სოციალურ საკითხთა კომიტეტების ერთობლივ სხდომაზე ფინანსთა მინისტრის პირველმა მოადგილემ გიორგი კაკაურიძემ „საქართველოს 2025 წლის სახელმწიფო ბიუჯეტის შესახებ“ საქართველოს კანონში ცვლილების შეტანის თაობაზე“ კანონპროექტი წარადგინა.

მომხსენებლის ინფორმაციით, 9 თვის ანალიზის გათვალისწინებით გადაიხედა როგორც რეალური ეკონომიკური ზრდის, ასევე სხვა მაკროეკონომიკური პარამეტრები. გარდა ამისა, გადაიხედა ბიუჯეტის როგორც შემოსულობების, ასევე ხარჯვითი ნაწილიც, სადაც გამოვლინდა რიგი პროგრამებისთვის დამატებითი რესურსების გამოყოფის აუცილებლობა.

ფინანსთა მინისტრის პირველი მოადგილის ინფორმაციით, მაკროეკონომიკური პარამეტრების პროგნოზები განახლდა, რომლის თანახმად, მთლიანი შიდა პროდუქტის რეალური ზრდის პროგნოზი 6%-ის ნაცვლად, 7.2%-ით განისაზღვრა. განახლებული პარამეტრების მიხედვით, ნაერთი ბიუჯეტის შემოსავლების გეგმური მაჩვენებელი 222,6 მლნ ლარით იზრდება და 32 133,5 მლნ ლარით განისაზღვრება.

რაც შეეხება სახელმწიფო ბიუჯეტის შემოსულობებს, 2025 წლის სახელმწიფო ბიუჯეტის შემოსულობების ჯამური მაჩვენებელი 22,7 მლნ ლარით იზრდება და 27 583,5 მლნ ლარს შეადგენს.

მომხსენებლის თქმით, წარმოდგენილი ცვლილებით, სახელმწიფო ბიუჯეტის ასიგნებები ჯამურად 27 952.9 მლნ ლარს შეადგენს, რაც დამტკიცებულ გეგმასთან შედარებით 11.2 მლნ ლარით არის გაზრდილი.

ფინანსთა მინისტრის პირველმა მოადგილემ კომიტეტების წევრებს საბიუჯეტო ასიგნებების ცვლილებებთან დაკავშირებით ინფორმაცია გააცნო. კერძოდ, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ასიგნებები 133 მლნ ლარით იზრდება და განისაზღვრება 8 953,0 მლნ ლარით.


248,3 მილიონი ლარით იზრდება საქართველოს გარემოს დაცვისა და სოფლის მეურნეობის სამინისტროს ასიგნებები და განისაზღვრება 1 056,4 მლნ ლარის ოდენობით.

ცვლილებების შედეგად, თავდაცვის სამინისტროს დამატებით 110 მილიონი ლარი, ხოლო სახელმწიფო უსაფრთხოების სამსახურს - 45,5 მილიონი ლარი გამოეყოფათ.

საბიუჯეტო დაფინანსების გაზრდაა ასევე გათვალისწინებული სპორტის სამინისტროს მიმართულებითაც, რომლის ბიუჯეტიც 32 მილიონი ლარით იზრდება და შეადგენს 330, 4 მლნ ლარს.

გიორგი კაკაურიძემ გაზრდილი საბიუჯეტო თანხებით დასაფინანსებელ პროგრამებსა და პროექტებზეც ისაუბრა და დეტალურად განმარტა თუ რომელ მიმართულებებს მოხმარდება აღნიშნული ფინანსური რესურსი.

მისივე თქმით, სამინისტროებს შორის გარკვეული უფლებამოსილების გადაადგილების შედეგად გამოთავისუფლებული თანხების და რიგი პროექტების შესრულებისას დაზოგილი თანხების შედეგად, საქართველოს რეგიონული განვითარებისა და ინფრასტრუქტურის სამინისტროს, ასევე განათლების, მეცნიერებისა და ახალგაზრდობის სამინისტროს დაფინანსება მცირდება. საბიუჯეტო დაფინანსება შეუმცირდება ასევე ეკონომიკისა და მდგრადი განვითარების, იუსტიციის და საგარეო საქმეთა სამინისტროებსაც. წლის განმავლობაში წარმოქმნილი ეკონომიის გათვალისწინებით, მიმდინარე წელს 20 მილიონით მცირდება საქართველოს პარლამენტის და 9 მილიონი ლარით ცენტრალური საარჩევნო კომისიის დაფინანსება.

კომიტეტების წევრებმა 2025 წლის სახელმწიფო ბიუჯეტში ცვლილებების პროექტი დადებითად შეაფასეს და კანონპროექტის პლენარულ სხდომაზე გატანას მხარი დაუჭირეს.