პარლამენტში სტუდენტებისთვის უმაღლესი განათლების რეფორმის პრეზენტაცია გაიმართა
განათლების, მეცნიერებისა და ახალგაზრდულ საქმეთა კომიტეტის ორგანიზებით, პარლამენტში სტუდენტებისთვის უმაღლესი განათლების რეფორმის პრეზენტაცია გაიმართა.
ღონისძიების მონაწილეებს სიტყვით პარლამენტის თავმჯდომარის პირველმა მოადგილემ გიორგი ვოლსკიმ, განათლების, მეცნიერებისა და ახალგაზრდულ საქმეთა კომიტეტის თავმჯდომარემ მარიამ ლაშხმა, კომიტეტის თავმჯდომარის პირველმა მოადგილემ გიორგი ჩაკვეტაძემ, თავმჯდომარის მოადგილემ გიორგი სოსიაშვილმა და განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ მიმართეს.
პარლამენტის თავმჯდომარის პირველმა მოადგილემ გიორგი ვოლსკიმ სიტყვით გამოსვლისას ყურადღება რეფორმის შინაარსობრივ მნიშვნელობაზე გაამახვილა და აღნიშნა, რომ პოლიტიკური დაპირისპირებისა და პროპაგანდის ფონზე, ხშირად იკარგება რეფორმის არსი და მნიშვნელოვანი მიმართულებები.
„დღეს რეფორმის შეფასება ხშირად არა შინაარსის, არამედ იმის მიხედვით ხდება, თუ ვინ იყო მისი ავტორი და ვინ მონაწილეობდა პროექტის შემუშავებაში. თუ ამ პროცესში ჩართული პირები პოლიტიკურად განსხვავებულ ან დაპირისპირებულ პოზიციას წარმოადგენენ, ჩნდება დამოკიდებულება, თითქოს რეფორმა არ ვარგა. მიუხედავად ამისა, ვერავინ უარყოფს იმ ფაქტს, რომ პირველად ჩვენი ქვეყნის დამოუკიდებლობის ისტორიაში, განათლება უფასო ხდება“, - განაცხადა გიორგი ვოლსკიმ.
განათლების, მეცნიერებისა და ახალგაზრდულ საქმეთა კომიტეტის თავმჯდომარემ მარიამ ლაშხმა მისასალმებელ სიტყვაში განათლების რეფორმის ორ მნიშვნელოვან მიმართულებაზე გაამახვილა ყურადღება.
„რეგიონებს მიენიჭება ახალი მუხტი, რაც სოციალური პასუხისმგებლობის ფარგლებში უზრუნველყოფს იმას, რომ ნებისმიერ ადამიანს, მისი სოციალური მდგომარეობისა თუ გეოგრაფიული მდებარეობის მიუხედავად, შესაძლებლობა ექნება მიიღოს ხარისხიანი და მაღალი სტანდარტების შესაბამისი უმაღლესი განათლება. ეს რეფორმა შრომის ბაზარზე მოთხოვნა-მიწოდების შეუსაბამობის აღმოფხვრასაც შეუწყობს ხელს“, - განაცხადა მარიამ ლაშხმა.
განათლების რეფორმის მნიშვნელობაზე ისაუბრა განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ და რეფორმის განხორციელების პროცესში პარლამენტის პასუხისმგებლობაზე გაამახვილა ყურადღება.
„ეს ისტორიული რეფორმაა, რომელიც ახალი თაობის განვითარებასა და საქართველოს მომავალს ეხება. გვაქვს პასუხისმგებლობა, რეფორმის განხორციელებისას თითოეულ თქვენგანთან დავამყაროთ კავშირი. რეფორმის ფარგლებში განსაზღვრულია შვიდი ძირითადი პრიორიტეტი, რომელთა განხორციელების პროცესშიც საქართველოს პარლამენტი აქტიურად იქნება ჩართული, რათა რეფორმა წარმატებით განხორციელდეს“, - განაცხადა გიორგი ჩაკვეტაძემ.
როგორც კომიტეტის თავმჯდომარის მოადგილემ გიორგი სოსიაშვილმა სიტყვით გამოსვლისას აღნიშნა, განათლების გზაზე საქართველოს უდიდესი ისტორია აქვს.
„ვდგავართ ახალი გზის დასაწყისთან. ქვეყანაში განათლების სისტემაში გაურკვეველი ექსპერიმენტები დასრულდა. ჩვენ დიდი ისტორიის ხალხი ვართ. მაშინ, როდესაც არ არსებობდა ერთა ჩანასახებიც კი, საქართველოში საუნივერსიტეტო განათლება გვქონდა იყალთოსა და გელათის აკადემიების სახით. ჩვენი გადარჩენის მთავარი საიდუმლო ხარისხიან განათლებაშია“, - განაცხადა გიორგი სოსიაშვილმა.
ღონისძიებაზე განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ სტუდენტებს უმაღლესი განათლების რეფორმა და ძირითადი მიმართულებები გააცნო.
გაიმართა პანელური დისკუსია, რომლის ფარგლებშიც სტუდენტებს შესაძლებლობა ჰქონდათ, უმაღლესი განათლების რეფორმასთან დაკავშირებით საკანონმდებლო და აღმასრულებელი ხელისუფლების წარმომადგენლებისთვის კითხვები დაესვათ.
ღონისძიებაში პარლამენტისა და აღმასრულებელი ხელისუფლების წარმომადგენლები, ასევე, სხვადასხვა უმაღლესი საგანმანათლებლო დაწესებულების სტუდენტები მონაწილეობდნენ.
