რეგიონული პოლიტიკისა და თვითმმართველობის კომიტეტის სხდომაზე იუსტიციის მინისტრის მოადგილემ გიორგი დგებუაძემ მთავრობის საკანონმდებლო ინიციატივის წესით მომზადებული, „მიწის ნაკვეთებზე უფლებათა სისტემური და სპორადული რეგისტრაციის წესისა და საკადასტრო მონაცემების სრულყოფის შესახებ“ საქართველოს კანონში ცვლილების შეტანის თაობაზე“, „ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების შესახებ“ საქართველოს კანონში ცვლილების შეტანის თაობაზე“ და „საჯარო რეესტრის შესახებ“ საქართველოს კანონში ცვლილების თაობაზე კანონპროექტები პირველი მოსმენით წარადგინა.

 

მომხსენებლის განცხადებით, მიწის სისტემური და სპორადული რეგისტრაცია 2016 წლიდან მოქმედებს და მიწის რეგისტრაციის მასშტაბურ რეფორმას სსიპ-საჯარო რეესტრის ეროვნული სააგენტო ახორციელებს. შესაბამისად, 2022-2025 წლებში 2 094 707 მიწის ნაკვეთი აიზომა და 1 469 581 მოქალაქე მიწის მესაკუთრე გახდა.

 

მისივე თქმით, მიუხედავად ჩატარებული მასშტაბური სამუშაოებისა, ცალკეულ მუნიციპალიტეტებსა და დასახლებებში გამოვლინდა, რომ მიწის ნაკვეთების საზღვრების გასწორება დაგეგმილთან შედარებით მეტ ნაკვეთზე გახდა საჭირო.

 

„აღნიშნულიდან გამომდინარე, მნიშვნელოვანია, რომ საჯარო რეესტრის ეროვნულმა სააგენტომ სპორადული რეგისტრაცია 1 წლით, 2027 წლის 1 იანვრამდე გააგრძელოს. შესაბამისად, სააგენტომ საქართველოს მუნიციპალიტეტებში, თვითნებურად დაკავებულ მიწის ნაკვეთზე საკუთრების უფლების აღიარება და დაუზუსტებელი საკადასტრო მონაცემებით რეგისტრირებული მიწის ნაკვეთის ანდა დაზუსტებული საკადასტრო მონაცემებით რეგისტრირებული მიწის ნაკვეთის იდენტურობის დადგენა უნდა უზრუნველყოს“, - აღნიშნა მინისტრის მოადგილემ.

 

მისივე თქმით, მიწის სპორადული რეგისტრაცია თვითმმართველი ქალაქების გარდა, საქართველოს ყველა მუნიციპალიტეტზე გავრცელდება.

 

გიორგი დგებუაძის განცხადებით, საკანონმდებლო ცვლილებების პროექტით, საჯარო რეესტრის ეროვნულ სააგენტოს ახალი ფუნქციები დაემატება, რათა მან ტოპოგრაფიული, გეოდეზიური და საკადასტრო აზომვითი სამუშაოები აწარმოოს. შესაბამისად, „საჯარო რეესტრის შესახებ“ საქართველოს კანონს ახალი ცნება - „სახელმწიფო ამზომველი“ დაემატება. შედეგად, აკრედიტაციის ერთიანი ეროვნული ორგანოს მიერ სერტიფიცირებული ფიზიკური პირი ტოპოგრაფიულ, გეოდეზიურ და საკადასტრო, მათ შორის, შენობა-ნაგებობებისა და მისი ერთეულის შიდა აგეგმვით/აზომვით სამუშაოებს შეასრულებს.

 

რეგიონული პოლიტიკისა და თვითმმართველობის კომიტეტის წევრებმა წარმოდგენილი საკანონმდებლო პაკეტის პლენარულ სხდომაზე გატანას მხარი დაუჭირეს.