ადამიანის უფლებათა დაცვისა და სამოქალაქო ინტეგრაციის და საპროცედურო საკითხთა და წესების კომიტეტების თავმჯდომარეები საქართველოში ვიზიტად მყოფ აშშ-ის კონგრესის წარმომადგენელთა პალატის კომისიის „პარტნიორობა დემოკრატიისთვის“ დელეგაციას შეხვდნენ.

შეხვედრის მთავარი თემა იყო საკონსტიტუციო და რეგლამენტის რეფორმის ფარგლებში საპარლამენტო კონტროლის გაძლიერება, ადამიანის უფლებების მიმართულებით განხორციელებული რეფორმები და ამერიკელი პარტნიორების გამოცდილების გაზიარება.

„ჩვენთვის ძალიან მნიშვნელოვანია ამერიკელი კოლეგებისა და ხალხის მხარდაჭერა იმ რეფორმებთან დაკავშირებით, რომელთაც საქართველოში ვახორციელებთ ადამიანის უფლებების მიმართულებით. მათი გამოცდილების გაზიარება საპარლამენტო კონტროლის გაძლიერებისთვის არის, ასევე, წინგადადგმული ნაბიჯი. ჩვენ, საკონსტიტუციო და რეგლამენტის რეფორმის ფარგლებში, ვცდილობთ გავზარდოთ საპარლამენტო კონტროლი. როცა ვამბობთ, რომ ვართ საპარლამენტო რესპუბლიკა, საპარლამენტო კონტროლიც უნდა იყოს სათანადო სიმაღლეზე. დღესდღეობით ამის ბერკეტები არ გაგვაჩნია და ახლა ნაბიჯ-ნაბიჯ ვქმნით ამ მექანიზმებს. ამ საქმეში ამერიკელი პარტნიორების ჩართულობა და მათი გამოცდილების გაზიარება უაღრესად მნიშვნელოვანია, რადგან ამერიკას აქვს ძლიერი საპარლამენტო კონტროლის ხანგრძლივი გამოცდილება“, - განაცხადა სოფო კილაძემ.

„ამერიკის შეერთებული შტატები ეს არის ის სახელმწიფო, სადაც მთავრობის წევრებზე კონტროლის მექანიზმები ძალიან ეფექტურია. კომისიის წევრებისგან მოვისმინეთ თუ როგორი პრაქტიკა არსებობს შეერთებულ შტატებში ამ თვალსაზრისით. გარდა ამისა, ვისაუბრეთ იმ ცვლილებებზე, რომელიც ხორციელდება საქართველოს პარლამენტის რეგლამენტში და რომელიც მიმართულია აღმასრულებელ ხელისუფლებაზე საპარლამენტო კონტროლის გაძლიერებისკენ. ამ კონტექსტში ჩვენს პარტნიორებთან გავცვალეთ მოსაზრებები“, - განაცხადა შეხვედრის დასრულების შემდეგ საპროცედურო საკითხთა და წესების კომიტეტის თავმჯდომარე გიორგი კახიანმა.