საქართველოს პარლამენტის წევრმა, მაჟორიტარმა დეპუტატმა დავით სონღულაშვილმა და გურჯაანის მუნიციპალიტეტის მერმა ზურაბ უტიაშვილმა გურჯაანის მუნიციპალიტეტში უკრაინიდან ჩამოსულ ოჯახებს სააღდგომო ნობათი გადასცეს და აღდგომის ბრწყინვალე დღესასწაული მიულოცეს.
​

„ჩვენი მეგობარი ქვეყნის, უკრაინის მოქალაქეები მოვინახულე და აღდგომის ბრწყინვალე დღესასწაული მივულოცე. რა თქმა უნდა, ძალიან მძიმეა მათთვის, რომ აღდგომას თავისი ქვეყნის გარეთ ხვდებიან. ჩვენთვისაც სამწუხარო რეალობაა, რადგან ეს განცდა არ არის უცხო ჩვენი თანამოქალაქეებისთვის. აუცილებელია, რომ თითოეულმა უკრაინელმა ოჯახმა თავი იგრძნოს ისე, როგორც საკუთარ სამშობლოში, როგორც საკუთარ ოჯახში და მეგობრების წრეში. დარწმუნებული ვარ, ჩვენი მცირედი ყურადღება და ზრუნვა, მათთვის მნიშვნელოვან მხარდაჭერას წარმოადგენს,“ - აღნიშნა გურჯაანის, სიღნაღის, დედოფლისწყაროსა და საგარეჯოს მაჟორიტარმა დეპუტატმა დავით სონღულაშვილმა.

პარლამენტის წევრმა, ასევე ხაზი გაუსვა ქართული საპარლამენტო დელეგაციის ვიზიტს უკრაინაში და აღნიშნა, რომ საქართველო მხარს უჭერს უკრაინის სუვერენიტეტსა და ტერიტორიულ მთლიანობას.

„საქართველო მტკიცედ უჭერს მხარს უკრაინის სუვერენიტეტს და ტერიტორიულ მთლიანობას. ამის ნათელი მაგალითია ჩვენი საპარლამენტო დელეგაციის ვიზიტი უკრაინაში. ის რომ, 21-ე საუკუნეში კიდევ არსებობენ საკუთარი ქვეყნიდან დევნილები და არსებობს აგრესორი, რომელიც შუაგულ ევროპაში თავს ესხმის სუვერენულ ქვეყანას, ეს არის მთელი მსოფლიოს ტრაგედია. კიდევ ერთხელ, ჩვენი მხარდაჭერა უკრაინას და უკრაინელ ხალხს,"- განაცხადა დავით სონღულაშვილმა.

გურჯაანის მუნიციპალიტეტში ამ დროისთვის უკრაინიდან ჩამოსული 11 ოჯახი იმყოფება.