იურიდიულ საკითხთა კომიტეტმა პირველი მოსმენით, დაჩქარებული წესით განიხილა და მხარი დაუჭირა „პოლიციის შესახებ“ კანონში ცვლილებას, რომელიც შინაგან საქმეთა სამინისტროს აკადემიისთვის საპოლიციო უმაღლესი საგანმანათლებლო დაწესებულების სტატუსის მინიჭების საკითხს ეხება.

 

კანონპროექტით, შინაგან საქმეთა სამინისტროს აკადემია უმაღლესი საგანმანათლებლო დაწესებულება გახდება და მისი სახელწოდება შეიცვლება საზოგადოებრივი უსაფრთხოებისა და პოლიციის აკადემიით (პოლიციის აკადემია).

 

კანონპროექტში გაწერილია პოლიციის აკადემიის უმაღლეს საგანმანათლებლო პროგრამაზე მიღებასთან, სწავლებასა და სტუდენტის სტატუსთან დაკავშირებული საკითხები.

 

როგორც მომხსენებელმა, შინაგან საქმეთა მინისტრის მოადგილე ალექსანდრე დარახველიძემ განაცხადა, ამ პროექტის განხორციელება მნიშვნელოვნად შეუწყობს ხელს სისტემაში მაღალი კვალიფიკაციის ახალი პოლიციელების მოზიდვას, რომლებიც შინაგან საქმეთა სამინისტროსთვის დასახული ამოცანების ეფექტიანად შესრულებას შეძლებენ.

 

„პროექტი პოლიციის სისტემაში ახალი საბაკალავრო პროგრამის შექმნას ითვალისწინებს. რაც მთავარია, სხვა არცერთ უნივერსიტეტს მსგავსი პროგრამა არ ექნება. გარდა ამისა, ჩვენ ვიღებთ პასუხისმგებლობას, სწავლის პერიოდში თითოეული სტუდენტი სრულად უზრუნველვყოთ ყველა გათვალისწინებული საჭიროებით - კვება, საცხოვრებელი, ფორმა, ტაქტიკური, ფიზიკური და საცეცხლე მომზადება. სწავლის დასრულების შემდეგ სახელმწიფო მათი სისტემაში დასაქმების ვალდებულებას იღებს“, - განაცხადა ალექსანდრე დარახველიძემ.

 

მისივე თქმით, შინაგან საქმეთა სამინისტროს აკადემიაში დღეს მოქმედი სპეციალური და პროფესიული გადამზადების პროგრამები დარჩება და ეს პოლიციის აკადემიის საქმიანობის მეორე მიმართულება იქნება.

 

შინაგან საქმეთა მინისტრის მოადგილემ დეპუტატების შეთავაზება გაიზიარა აღნიშნულ საკითხთან ერთად განიხილონ სახელმწიფო უსაფრთხოების სამსახურისთვის ერთწლიანი სამაგისტრო პროგრამის შექმნის საკითხი.