საქართველოს პარლამენტის თავმჯდომარე შალვა პაპუაშვილი, ინდოეთში ვიზიტის ფარგლებში, ინდოეთის პარლამენტს ეწვია.

საქართველოს პარლამენტის დელეგაციას ინდოეთის პარლამენტის ქვედა და ზედა პალატის სხდომებზე მიესალმნენ.

​შალვა პაპუაშვილმა ინდოეთის პარლამენტის საპატიო სტუმართა „ოქროს წიგნში" ჩანაწერი გააკეთა.

საქართველოს პარლამენტის თავმჯდომარე ინდოეთის პარლამენტის ქვედა - სახალხო პალატის (ლოკ საბჰა) თავმჯდომარეს, ომ ბირლას შეხვდა.

​მხარეებმა დადებითად შეაფასეს საქართველოსა და ინდოეთს შორის ორმხრივი ურთიერთობები, რომელიც სხვადასხვა მიმართულებით წარმატებით ვითარდება.

ამ კუთხით, აღინიშნა ინდოეთში საქართველოს პარლამენტის თავმჯდომარის პირველი ოფიციალური ვიზიტის მნიშვნელობა.

​შალვა პაპუაშვილმა ინდურ მხარეს საქართველოს სუვერენიტეტისა და ტერიტორიული მთლიანობის მხარდაჭერისთვის მადლობა გადაუხადა.

აღნიშნა, რომ თბილისში უკვე ფუნქციონირებს ინდოეთის საელჩო და ქართული მხარე ინდოეთის პირველი ელჩის დანიშვნას ელოდება.

​მხარეებმა საპარლამენტო ურთიერთობების გაძლიერების საკითხზე ისაუბრეს და წელს, უზბეკეთში, საპარლამენტთაშორისო კავშირის (IPU) ფარგლებში გამართული შეხვედრის მნიშვნელობას ხაზი გაუსვეს.

​მხარეებმა აგრეთვე განიხილეს ვაჭრობის, ეკონომიკის, ტურიზმის, კულტურისა და განათლების მიმართულებებით თანამშრომლობის საკითხები.

შეხვედრაზე საუბარი ასევე შეეხო შუა დერეფნის მზარდ მნიშვნელობას და მისი პოტენციალის უკეთ გამოყენების მიზნით, თანამშრომლობის საჭიროებას.

​შალვა პაპუაშვილმა ინდოეთის პარლამენტის ქვედა პალატის თავმჯდომარე საპასუხო ვიზიტით საქართველოში მოიწვია.

საპარლამენტო დელეგაციის შემადგენლობაში შედიან: საგარეო ურთიერთობათა კომიტეტის თავმჯდომარე ნიკოლოზ სამხარაძე, ინდოეთის პარლამენტთან მეგობრობის ჯგუფის ხელმძღვანელი ვასილ ჩიგოგიძე, ეკონომიკური პოლიტიკის კომიტეტის თავმჯდომარე შოთა ბერეკაშვილი, ფრაქცია „ქართული ოცნების“ თავმჯდომარის მოადგილე გრეტა წიწავა.